ಗಿರಿಜಕ್ಕ ಕಟ್ಟಪುನಿಟ್ ಬಾರಿ ಬೀಸ ಬೀಸ ಬರೊಂದಿತ್ತೆರ್. ಬರ್ಪಿನ ಪೋರ್ಸುಗು ಕುಂಟು ಪೂರ ಬೆಗರ್ದ್ ಚಂಡಿ ಪುಂಡಿ ಆತುಂಡ್. ಓಲು ಎನ್ನ ಕೈಯಿರ್ದ್ ತತ್ತ್‌ದ್ ಪೋಪುಂಡಾ ಪನ್ಪಿನ ಪೋಡಿಗೆ ಅರೆನ ಮೋನೆಡ್ ತೋಜೊಂದ್ಂಡು. ಇನಿ ತಿಕಿಜಿಡ ಬೊಕ್ಕ ಸದ್ಯೊಗ್ ತಿಕ್ಕಂದ್ ಪಂದ್ ಎನ್ನೊಂದ್ ಬಾರಿ ಬೀಸೊಡೆ ಪಜ್ಜೆ ಪಾಡೊಂದ್ ಬರೊಂದಿತ್ತೆರ್. ಅಲ್ಪನೆ ಬರಿಟ್ ಪಜಿರ್ ಕೆತ್ತೊಂದಿತ್ತಿನ ಕಾಂತಣ್ಣಗ್ ಜೋರು ಜೋರು ಸ್ವಾಸ ಬುಡೊಂದ್ ಬರೊಂದಿತ್ತಿನ ಗಿರಿಜಕ್ಕನ್ ತೂದು ದಿಗಿಲಾಂಡ್. ಅಕ್ಕೆರೆ ಈ ನಮುನೆ ದಂಬ್ ಕಟ್ಟೊಂದ್ ದೂರ ಪಿಡದಿಯರ್ ,ಎರೆಗ್ ದಾದಾಂಡ್ ಪಂದ್ ಪೋಡಿದ್ ಕೇನ್ಡೆರ್. ಅಯ್ಯ ಗ್ರಾಚಾರನೆ ಈ ಸನಿ ಇತ್ತೆನೆ ಎಂಕ್ ತಿಕ್ಕೊಡಾ ಪಂದ್ ಎನ್ನೊಂದ್ ಅಡೆಗೆ ಗಕ್ಕ ಉಂತಿಯೆರ್ ಗಿರಿಜಕ್ಕ. ದಂಬ್ ಬರ್ಪಿನೆಟ್ಟ್ ಅರೆಗ್ ಉಸುಲ್ ದೆಪ್ಪರೆ ಆವೊಂದಿತ್ತುಜಿ. ಒರ ಮಲ್ಲ ಸ್ವಾಸ ದೆತ್ತೊಂದು ಕಾರ್ದ ಗಂಟ್‌ನೊರ ಪೂಜಿದ್ ಸರ್ತ ಉಂತ್‌ದ್ ಪಂಡೆರ್ ಎರೆಗ್ಲಾ ದಾಲ ಆತುಜಿ ಕಾಂತು ಸ್ಟೋರುಡು ಬೊಲಂತೆ ಬೈದ್ಂಡ್‌ಗೆ, ಆಜಿ ತಿಂಗೊಲು ಆಂಡ್ ಮಾರಾಯ ತಿಕ್ಕಂದೆ ಅಂಚ ಕನರೆಂದ್ ಪಿದಡಿನಿ. ಸ್ಟೋರ್‌ದ ಬೊಲಂತರಿತ ನೀರ್ ದೋಸೆ ಬಾರಿ ಸೋಕಾಪುಂಡು, ಯಾನ್ ಬರ್ಪೆ ಮಾರಾಯ ಕಡೆಸ್ಂಡ ಅಲ್ಪ ದಾಲ ತಿಕ್ಕಂದ್ ಪನೊಂದು ತುರು ತುರು ಪೋದೆ ಬುಡಿಯೆರ್. ಕಾಂತಣ್ಣನ ಮೋನೆ ಬೊಲ್ಚಿ ಏರ್ಂಡ್ ಅತ್ತ್ ಇಂಚಿನ ಜನಕುಲ್ಲಾ ಉಪ್ವೆರಾ? ಅರಿ ಕನರೆ ಈ ನಮುನೆಡ್ಲಾ ಬಲ್ಪೊಡಾ ಉಂದು ಬಾಕಿದಕುಲು ತಿಗಲೆ ಪುಡಾದ್ ಸೈಪಿನ ಬೇರ ಪನ್ನೊಂದು ಬೆಗರೊಚ್ಚೊಂದ್ ಪಜಿರ್ ಕೆತ್ತರೆ ಕುಲಿಯೆರ್.
- ಗೀತಾ ಲಕ್ಷ್ಮೀಶ್ ಕುಡ್ಲ