ಇತ್ತೆದ ಜೋಕುಲು ಮಣ್ಣ್ ಡ್ ಗೊಬ್ಬುನೆನ್ ಕಮ್ಮಿ ಮಲ್ತ್ ನಯಿಡ್ದಾವರನೋ ದಾನ್ನೊ?! ಜೋಕುಲೆಗಿತ್ತೆ ಸೀಕ್ ಸಂಕಡೊಲು ಬೇಕ ಪಗರೋಂದುಂಡು; ಬತ್ತ್ ನವು ಆತ್ ಬೇಕ ಪೋಪುನೆಲಾ ಇಜ್ಜಿ. ಮಣ್ಣ್ ಡ್ ಗೊಬ್ಬುಂಡ ಸುಬ್ಬ ಲೆಕಂದಿನ ಬೊಲ್ದು ಕಲೆ ಮೇಲ್ಡ್ ಬೂರುಜೀಂದ್ ಡಾಕ್ಟರ್ ನಕುಲು ಪನ್ಪೆರ್. ಅಂಚ ಜೋಕುಲೆಗೊಂಜಿ ಇಸ್ಟ ಆದಿತ್ತ್ ನ ನಮ್ಮ ಕಾಸ್ರೋಡುದ ಒಂಜಿ ಮಣ್ಣ್ ದ ಗೊಬ್ಬು ‘ಅಕ್ಕಿತ್ತೋ….. ಮಾಯಿತ್ತೋ’. ಕಮ್ಮಿಡ್ ಪತ್ತ್ ಜೋಕುಲು ಸೇರ್ಯೇರ್ಂಡ ‘ಅಕ್ಕಿತ್ತೋ ಮಾಯಿತ್ತೋ' ಗೊಬ್ಬು ಗೊಬ್ಬೊಲಿ. ಈ ಗೊಬ್ಬುಗು ಸರಿ ಸಮಾನದ ರಡ್ಡ್ ಕೂಟೊ ಮಲ್ಪೊಡು. ಕಮ್ಮಿಡ್ ಪತ್ತ್ ಸೆಂಟ್ಸ್ ದಾತ್ ಪಿದಯಿ ಜಾಗೆ (ತೆರೆದ ಸ್ಥಳ) ಬೋಡು. ಈ ಜಾಗೆನ್ ರಡ್ಡ್ ಕೂಟೊದಕುಲೆಗ್ ರಡ್ಡ್ ಪಾಲ್ ಮಲ್ತ್ ದ್ ಗೊಬ್ಬುಗು ಈತ್ ನಿಮಿಷ ಪಂದ್ ನಿಗಂಟ್ ಮಲ್ಪೊಡು. ಗೊಬ್ಬು ಸುರುಂದ್ ಪಂಡಿ ಕೂಡ್ಲೆ ಅಕ್ಲಕ್ಲೆ ಕೂಟೊ ಒತ್ತೊನುನ ಜಾಗೆಗ್ ಪೋದು ಆಪೆದ ಕೂಟೊದಕುಲು ತೂವಂದಿಲೆಕ ದುಂಬೇ ಮಲ್ತ್ ದೀನ ನೈಸ್ ದ ಪೊಡಿ ಮಣ್ಣ್ ನ್ ಕೈಟ್ ಪತ್ತ್ದ್ ಏತ್ ತೀರುಂಡಾ ಆತ್ ಮಣ್ಣ್ದ ಬೊಟ್ಟನ್ (ಚುಕ್ಕೆ) ಗೆನ್ಪೆರೆ ಆಪುಲೆಕ ನೆಲಟ್ ದೀವೊಡು. ಗೊಬ್ಬುದ ಪೊರ್ತು ಕರಿನಗ ಈ ಕೂಟೊಡುದ್ “ಅಕ್ಕಿತ್ತೋ ಮಾಯಿತ್ತೋ” ಪನ್ನಗ ಆ ಕೂಟೊದಕುಲುಲಾ ಅಂಚೆನೇ ಬೊಬ್ಬೆ ಪಾಡುದು "ಎಂಕ್ಲೆಗ್ ಲಾ ಮಣ್ಣ್ ದ ಬೊಟ್ಟೊ ದೀದ್ ಆಂಡ್" ಪಂಡ್ದ್ ಒಪ್ಪಿಗೆ ಕೊರ್ಪೆರ್. ಅಪಗ ರಡ್ಡ್ ಕೂಟೊಲಾ ಸೇರುನ ನಡು ಜಾಗೆಗ್ ಮಾತೆರ್ಲಾ ಬತ್ತ್ ಸೇರ್ವೆರ್. ಅಲ್ಪ ಪಾತೆರ್ದ್ ಒಂಜಿ ಕೂಟೊದಕುಲು ಬೊಟ್ಟ ದೀನ ಜಾಗೆಗ್ ಬೊಕೊಂಜಿ ಕೂಟದಕುಲು ಪೋದ್ ನಾಡ್ ನಾಡ್ದ್ ತೂಯೆರೆ ತಿಕ್ಕ್ನ ಬೊಟ್ಟೊಲೆನ್ ಪೂರ ಮಾಜಾವೆರ್. ಅಂಚ ಬೊಟ್ಟೊಲೆನ್ ಮಾಜಾದ್ ಆಯಿಬೊಕ್ಕ ”ಎಂಕ್ಲೆಡ್ದ್ ಮಾಜಾದ್ ಪೂರಾ ಆಂಡ್, ನನ ನಿಕ್ಲೆಗ್ ಗೆನ್ಪೊಲಿಂದ್” ಬೊಟ್ಟನ್ ಮಾಜಾಯಿನ ಕೂಟೊದಕುಲು ಪನ್ಪೆರ್. ಅಪಗ ಮಾಜಾವಂದೆ ಬುಡ್ದ್ ಪೋದ್ ಬಾಕಿ ಒರಿನ ಬೊಟ್ಟಲೆನ್ ; ಬೊಟ್ಟ ದೀನ ಕೂಟೊದಕುಲು ತೋಜಾದ್ ಏತ್ ಒರಿದ್ಂಡ್ ಪಂಡ್ ದ್ ಗೆನ್ಪೊಡು. ಈ ಕೂಟೊಡು ಗೆನ್ತಿ ಬೊಕ್ಕ ಒಟ್ಟು ತಿಕ್ನ ಬೊಟ್ಟೊಲೆನ ಸಂಖ್ಯೆ ನೆಂಪು ದೀವೊಡು. ಅಂಚನೇ ನನ ಈಪೆದ ಕೂಟೊದಕುಲು ಅಪೆದ ಕೂಟೊದಕುಲು ದೀನ ಜಾಗೆಗ್ ಪೋದ್ ಮಣ್ಣ್ ದ ಚುಕ್ಕೆಲೆನ್ ನಾಡುದ್ ಪೂರಾ ಮಾಜಾವೊಡು. ಅಯಿಡ್ದ್ ಬೊಕ್ಕ “ಪೂರಾ ಮಾಜಾದಾಂಡ್” ಪಂಡ್ದ್ ಅಕ್ಲೆನ ಒಪ್ಪಿಗೆ ತಿಕ್ಕಿ ಬೊಕ್ಕ; ಮಾಜಾವಂದೆ ಒರಿದಿನ ಚುಕ್ಕೆಲೆನ್ ಮೂಲು ಚುಕ್ಕೆ ದೀಯಿನ ಕೂಟೊದಕುಲು ಗೆನ್ಪೊಡು. ಈಪೆದ ಕೂಟೊದಕುಲು ದೀನ ಚುಕ್ಕೆಲೆನ್ ಆಪೆದಕುಲು ಮಾಜಾದ್, ಅಪೆದ ಕೂಟದಕುಲೆನ ಚುಕ್ಕೆನ್ ಈಪೆದಕುಲು ಮಾಜಾದ್; ಮಾಜಾಯೆರೆ ಬುಡ್ದ್ ಪೋದು ಒರಿದಿನ ರಡ್ಡ್ ಕೂಟೊದಕುಲೆನಲಾ ಚುಕ್ಕೆಲೆನ್ ಗೆನ್ಪುನಗ ವಾ ಕೂಟೊದಕುಲು ದೀನ ಚುಕ್ಕೆಲು ಜಾಸ್ತಿ ತಿಕ್ಕುಂಡಾ ಆ ಕೂಟ ಗೆಂದ್ಂಡ್ಂದ್ ಲೆಕ್ಕ.
ಈ ಗೊಬ್ಬುಗು ದೊಂಬು ಇತ್ತ್ ನ ಕಾಲ ಆಂಡ ಎಡ್ಡೆ. ನುಂಗೆಲ್ ಮೆತ್ತನೆದ ನೈಸ್ ಮಣ್ಣ್ ಬೋಡು. ಮಣ್ಣ್ ನ್ ತಾರಯಿದ ಚಿಪ್ಪಿಡ್ ಪತ್ತೊಂದಿತ್ತ . ಮಾಜಾಯೆರೆ ತಿಕ್ಕಂದಿಲೆಕ್ಕೊ ಚುಕ್ಕೆ ದೀಪುನ ಕೆಣಿ ಈ ಗೊಬ್ಬುಡು ಉಂಡು. ಪುಂಡಿ ಪತ್ತ್ ದಾ , ರಡ್ಡ್ ಬಿರೆಲ್ದ ಕೊಡಿತ್ತ ಕಿನ್ಕೆಲ್ ಡಾ (ಚಿಟಿಕೆ) ಮಣ್ಣ್ ದ ಪೊಡಿ ಪತ್ತ್ ದ್ ಬೊಟ್ಟ ದೀವೊಂದಿತ್ತ. ನೆಲಟ್ಟ್ ಓಲೋಲು ಚುಕ್ಕೆ ದೀನಗ ಜಾಗೆನೊರ ಸುತ್ತ ಮುತ್ತ ಸರಿಟ್ಟೇ ತೂವೊಡು. ಪಜಿರ್, ದೈಕ್ಲೆ ನಡುಟ್ಟು ನೆಲಟ್ಟ್ ಮಣ್ಣ್ ದ ಬೊಟ್ಟೊ ದೀಪುನ ಈ 'ಅಕ್ಕಿತ್ತೋ ಮಾಯಿತ್ತೋ’’ ಗೊಬ್ಬುಡು ಮಣ್ಣ್ ದ ಕಮ್ಮೆನೊ ( ಬ್ಯಾಕ್ಟೀರಿಯಾ ಸ್ಪರ್ಶ) ನೇರ್ಪೊಡು ತಿಕುನಯಿಡ್ದ್ ಆದ್ ಜೋಕ್ಲೆಗ್ ರೋಗ ಪ್ರತಿರೋಧ ಶಕ್ತಿ ಎಚ್ಚಾಪುನಯಿಟ್ಟ್ ಸಂಶಯೊನೇ ಇಜ್ಜಿ. ಪೊಡಿ ಮಣ್ಣ್ ನ್ ಪುಂಡಿ ಕೈಟ್ ಪತೊನ್ನಗ ಅರಿತ್ತ ನೆಂಪಾದ್ ಶಾಲೆಗ್ ಪೋಪುನ ಜೋಕ್ಲೆನ ಬಾಯಿಡ್ ಕನ್ನಡ ಬಾಸೆದ ‘ಅಕ್ಕಿ' ಪುದರ್ ಬತ್ತ್ ದುಪ್ಪು. ಆ ಅಕ್ಕಿನ್ ಮಾಜಾವುನ ಗೊಬ್ಬೇ ‘ಅಕ್ಕಿತ್ತೋ ಮಾಯಿತ್ತೋ’.
