ಸಂದರ್ಶಕ : ಡಾ. ಅರವಿಂದ ಶ್ಯಾನಭಾಗ, ಬಾಳೇರಿ
ಆರತಾ ಕರ್ನಾಟಕ ಮಾಹಿತಿ ಆಯೋಗಾಕ ಮಾಹಿತಿ ಆಯುಕ್ತ ಮೋಣು ನೇಮಣೂಕಿ ಜಾಲಿಲೊ ಕೊಂಕಣಿ ಮನೀಸ ಮಾನೆಸ್ತ ರವೀಂದ್ರ ಗುರುನಾಥ ಧಾಕಪ್ಪ. ಹಾನ್ನಿ ಉತ್ತರಕನ್ನಡ ಜಿಲ್ಲೆಚೆ ಶಿರಸಿಚೆ. ಮಾರಿಕಾಂಬಾ ದೇವಳಾಚೆ ನಿರ್ಮಾಣ 1689 ತು ಹಾಂಗೆಲೆ ಪೂರ್ವಿಕಾನಿ ಕೆಲ್ಲಿಲೆ. ತಸಲೆ ಸಾಮಾಜಿಕ ಸೇವಾಸಕ್ತ ಧಾಕಪ್ಪ ಘರಾಣೆಚೆ ವ್ಯಕ್ತಿಕ ರಾಜ್ಯಾಚೆ ಹೋಡ ಸಂವಿಧಾನಿಕ ಹುದ್ದೊ ಮೆಳಿಲೆ ಸರ್ವ ಕೊಂಕಣಿ ಲೊಕಾಂಕ ಭರಮ. ತಾಂಗೆಲೆ ವಾಂಗಡಾ ಪತ್ರಿಕೆ ತರಪೆನ ಚಲಯಿಲ್ಲೆ ಏಕ ಲಾನ ಸಂದರ್ಶನ.
ಸುರವೆಕ ತುಮಕಾ ಅಭಿನಂದನ.
ಧನ್ಯವಾದ.
ಮಾಹಿತಿ ಆಯೋಗಾಂತು ತುಮಗೆಲೆ ಕಾರ್ಯವೈಖರಿ ಕಶಿ ಉರತಲೆ?
ಆತ್ತ ಮಾಕ್ಕಾ ತೀನ ವರಸಾಚೆ ಅವಧಿಕ ಆಯುಕ್ತ ಮ್ಹೋಣು ನೇಮಕ ಕೆಲಿಲೆ ಆಸಾ. ಥೊಡೆ ಮಹಿನೆ ಕಾಮ ಬೆಂಗಳೂರ ದಫ್ತರಾ ಥಾವನು ಸಾಂಬಾಳಚೆ ಜಾತ್ತಾ. ಮೆಗೆಲೆ ನೇಮಣೂಕಿ ಗುಲ್ಬುರ್ಗಾ ಪೀಠಾಕ ಮ್ಹೋಣು ಕೆಲ್ಯಾ. ಜಾಲ್ಯಾರಿ ಗುಲ್ಬುರ್ಗಾಂತು ಮಾಹಿತಿ ಪೀಠ ನಾ. ಕಲ್ಯಾಣ ಕರ್ನಾಟಕ ಭಾಗಾಚೆ ಲೊಕಾಖಾತೀರ ಹೇಂ ಪೀಠಾಚೆ ಸ್ಥಾಪನಾ ಜಾಲ್ಯಾ. ನವೀನ ಬೇಂಚ್ ದೆಕೂನು ಆತ್ತ ಥಂಯಿಚೆ ಜಿಲ್ಲಾ ಪ್ರಶಾಸನಾಚೆ ವಾಂಗಡಾ ಉಲೊವನು ಆಫೀಸಾಚೆ ಜಾಗೆಚೆ ವ್ಯವಸ್ಥಾ ಕರಕಾ. ಥಂಯಿ ಪರ್ಯಂತ ಪ್ರಕರಣಾಚೆ ವಿಚಾರಣಾ ಬೆಂಗಳೂರ ಥಾವ್ನುಚ ಚಲತಾ.
ತುಮ್ಮಿ ಅಧಿಕಾರ ಸ್ವೀಕಾರ ಕರಚೆ ಕೆದಾನಾ?
ಕರ್ನಾಟಕಾಚೆ ರಾಜ್ಯಪಾಲ ಮಾನೆಸ್ತ ಥಾವರಸಿಂಗ್ ಗೆಹ್ಲೋಟ್ ಹಾಂಗೆಲೆ ಸಮ್ಮುಖಾಂತು ಮೇ 7 ಕ ಹಾಂವೆ ಪ್ರಮಾಣವಚನ ಸ್ವೀಕಾರ ಕೆಲ್ಯಾ. ಜೂನ್ 1 ಕ ಗುಲ್ಬುರ್ಗಾ ಪೀಠಾಕ ಮಾಹಿತಿ ಆಯುಕ್ತ ಮ್ಹೋಣು ಕಾಮ ಶೂರು ಕರಚೆ ಆಸಾ.
ಗುಲ್ಬುರ್ಗಾಂತು ಮಾಹಿತಿ ಆಯೋಗಾಚೆ ಪೀಠ ಹಾಜ್ಜೆ ಫೂಡೆ ಆಶಿಲೆವೆ?
ನಾ. ಹಾಂವುಚ ಗುಲ್ಬುರ್ಗಾ ಪೀಠಾಕ ಪಯಲೆ ಆಯುಕ್ತ.
ಮಾಹಿತಿ ಹಕ್ ಕಾನೂನಾವಿಶಿಂ ಲೋಕಾಂಕ ಜಾಣ್ವಾಯ್ ಆಸಾ ಮ್ಹೋಣು ತುಮ್ಮಿ ಸಮಜತಾವೆ?
ಮಾಹಿತಿ ಕಾನೂನ್ ಯವನು 17 ವರಸ್ ಜಾಲ್ಲೆತರಿ ಆಜಿಪರ್ಯಂತ ಲೊಕಾಂನಿ ಹಾಂತು ಅಧ್ಯಯನ ಕೆಲ್ಲಿಲೆ ಊಣೆಚ ಮ್ಹಣಯೇತ. ಸರಕಾರಿ ನೌಕರ ಆನಿ ಅಧಿಕಾರಿಂಕ ಹಾಜ್ಜೆ ಜ್ಞಾನ ಚಡ ನಾಶಿಲೆಕ ವಿನಾಕಾರಣ ಭಿತ್ತಾತ್. ಹೇಂ ಕಾನೂನ್ ಚಾಲ್ತಿಕ ಹಾಡಿಲೆ ಮುಖೇಲ್ ಉದ್ದೇಶ ಪ್ರಶಾಸನ ವ್ಯವಸ್ಥೆಂತು ಪಾರದರ್ಶಕತಾ ಹಾಡಚೆ. ತ್ಯಾ ದೆಕೂನು ಮೆಗೆಲೆ ಪಯಲೆಚೆ ಆದ್ಯತಾ ಜಾವನು ಆಸಾ, ಹೆಂ ಕಾನೂನಾವಿಶಿಂ ಸರ್ವಾಂಕ ಜಾಗೃತ ಕರಚೆ.
ಪಾರದರ್ಶಕ ವ್ಯವಸ್ಥಾ ಮ್ಹಳ್ಯಾರ್?
ಸಾರ್ವಜನಿಕಾಂಕ ಸರ್ಕಾರಿ ಸಂಸ್ಥೆಂತು ಚಲಚೆ ಸಕ್ಕಡ ವ್ಯವಹಾರಾಚೆ ಮಾಹೆತ್ ವಳಕುನು ಘೆವಚೆ ಅಧಿಕಾರ ಆಸಾ. ಲೊಕಾಂಕ ಜಾವಕಾ ಜಾಲ್ಲಿಲೆ ಮಾಹೆತ್ ನೇಮಾಪ್ರಕಾರ ಮೆಳೊವನು ದಿವಚೆ ಕಾಮ ಆಯೋಗಾಚೆ. ತ್ಯಾ ದೆಕೂನು ಹರ್ಯೇಕ್ ಸಂಘಸಂಸ್ಥೆನ ತಾಂಗೆಲೆ ವೆಬ್ ಸೈಟಾಂತು ಮಾಹೆತ್ ಘಾಲ್ಲೆರ್ ಕಾನೂನಾಚೆ ಭಯ ನಾಶಿಚ ಪಾರದರ್ಶಕ ವ್ಯವಸ್ಥಾ ಅನುಷ್ಟಾನಾಕ ಹಾಡಯೇತ. ತೆನ್ನಾ 90% ಸಮಸ್ಯಾ ನಿವಾರಣ ಜಾತ್ತಾ. ಕೊಣಾಕಯಿ ಗೊಂದೊಳ್ ಊರನಾ.
ಮಾಹಿತಿ ಕಾನೂನಾಚೆ ದುರುಪೇಗ ಚಡ ಜಾತ್ತಾಸಾ ನೈವೆ?
ಹೊಯಿ. ಹೇಂ ಮನಶಾಲೆ ಸಹಜ ಗೂಣ. ಖಂಯಚೆಯ್ ಕಾನೂನ್ ಆಯಲೆರ್ ಬಿ ತಾಜೆ ಬರೆ ಉಪೇಗ ಕರತ ದುರುಪೇಗ ಕರಚೆ ಜಣಯಿ ಉರತಾ. ಕಾನೂನ್ ವಾಯ್ಟಾಕ ವಾಪರಚೆ ಪಶೆಂ ಬರೆ ಉದ್ದೇಶಾಕ ವಾಪರಚೆ ತಶಿ ಉತ್ತೇಜಿತ ಕರಕಾ. ಪಾರದರ್ಶಕತಾ ಆಸಲೆರಿ ಖಂಚೆಯ್ ಸಂದರ್ಭಾರ್ ಕೊಣಾಕಯ್ ಭಿವಚೆ ಅಗತ್ಯ ನಾ. ತ್ಯಾ ದೆಕೂನು ಹಾಂವೆ ಸಾಂಗಚೆ, ಅಧಿಕಾರಶಾಹಿ ವ್ಯವಸ್ಥೆಂತು ಸರ್ಕಾರಾಚೆ ಕಾಮಾವಿಶಿಂ ಅನುಮಾನ ಯೇನಾತಶಿ ಸಗಟ ಮಾಹೆತ್ ವೆಬ್ ಸೈಟಾಕ ಘಾಲ್ಲೆರಿ ಹೆಂ ಕಾನೂನಾಚೆ ಉದ್ದೇಶ ಸಾಕಾರ ಜಾತ್ತಾ.
ಮಾಹಿತಿ ಕಾನೂನಾಚೆ ಭಯ ಆಸಲೆರಿವರಿ ಸುಮಾರಶೆ ಅಧಿಕಾರಿಯೊಂ ಮಾಹೆತ್ ದಿವಪಾಕ ಸಾತ-ಆಟ ಮಹಿನೊ ಸಾರ್ವಜನಿಕಾಂಕ ವಾವಂಟ ದಿತ್ತಾತ್. ಅಸಲೆ ವ್ಯವಸ್ಥಾ ಬದಲಿ ಕರಚೆ ಕಶೆಂ?
ಮಾಹೆತ್ ವೆಬ್ ಸೈಟಾಕ ಘಾಲ್ಲೆರಿ ಅಸಲೆ ಸಮಸ್ಯಾ ನಿವಾರಣ ಜಾತ್ತಾ. ಥೋಡೆ ಪ್ರಕರಣಾಂತು ತುಮ್ಮಿ ಸಾಂಗಿಲೆ ತಶಿ ಕಾಲವಿಳಂಬ ಜಾಲ್ಲಿಲೆ ಹಾಂವು ಪಳಯಲಾ. ವಿಚಾರಿಲೆ ಮಾಹೆತ್ ದೀನಾಶಿ ದುಸರೆ ಮಾಹೆತ್ ದಿವಚೆ, ಅನಗತ್ಯ ಅರ್ಜಿ ವರ್ಗ ಕರಚೆ, ಅಧಿಕಾರಿ ಲೊಕಾಂಕ ಮಾಹಿತಿ ಕಾನೂನಾಚೆ ಸ್ಪಶ್ಟ ಜ್ಞಾನ ನಾಶಿ ಆಸ್ಸೂಚೆ ನಿಮಿತ್ತ ಅಸಲೆ ಸಮಸ್ಯಾ ಯೆತ್ತಾ. ಮಾಹಿತಿ ಅರ್ಜಿಕ ಪತ್ರಮುಖೇನ ದಿವಚೆ ಜವಾಬ ತುರಂತ ದಿಲ್ಲೆರಿ ಕಾಲವಿಳಂಬ ಜಾಯನಾ. ಉದಾಹರಣೆಕ ಏಕ ಅರ್ಜಿಂತು 10-20 ವಿಚಾರಾರಿ ಮಾಹಿತಿ ವಿಚಾರಿಲ್ಲೆ ತೆದಾನಾ ಅಧಿಕಾರಿನ ನಿಯಮ 14 ತು ಸಾಂಗಿಲೆತಶಿ ಏಕ ವರಶಾಕ ಸಂಬಂಧ ಪಾವಿಲ್ಲೆ ಆನಿ ಫಕ್ತ ಏಕ ವಸ್ತುವಿಶಯಾಕ ಮಾಹೆತ್ ದಿಲ್ಲೆರಿ ಜಾಲ್ಲೆ. ಹೇಂ ಕಾಮ 30 ದಿವಸಾಂತು ಕರಚಾಕ ಜಾತ್ತಾ. ಹಾಕ್ಕಾ ಹೋಡ ಪ್ರಮಾಣಾಚೆ ಕ್ಯಾಂಪೇನ್ ಕರಚೆ ಗರಜೆಚೆ ಮ್ಹೋಣು ಮಾಕಾ ದಿಸತಾ. ಮಾಹಿತಿ ಕಾರ್ಯಕರ್ತಾನಿ ಸಹಕಾರ ದಿಲ್ಲೆರಿ ಸಂಪನ್ಮೂಲ ವ್ಯಕ್ತಿಂಕ ಘೇವನು ವಿಚಾರ ವಿನಿಮಯ ಕರಚಾಕ ಜಾತ್ತಾ.
ಅಪೂರ್ಣ, ಚೂಕ ಆನಿ ವಿಳಂಬ ಮಾಹಿತಿ ದಿಲ್ಲಿಲೆ ಅಧಿಕಾರಿಕ ದಂಡನಾ ದಿಯಾ ಮ್ಹೋಣು ಮಾಹಿತಿ ಆಯೋಗಾಕ ಆಮ್ಮಿ ಅಪೀಲ ಗೆಲ್ಲೆರ್ ಆಯೋಗ ‘ಹೇಂ ದಂಡನೆಕ ಅರ್ಹ ನಾತ್ತಿಲೆ ಪ್ರಕರಣ’ ಮ್ಹೋಣು ತಾಂಕಾ ಕಾಂಯಿ ದಂಡ ಘಾಲನಾಶಿ ಅರ್ಜಿ ವಿಲೇ ಕರತಾ. ಹಾಂಗಾ ಅರ್ಜಿದಾರಾಕ ಅನ್ಯಾಯ ಕೆಲ್ಲಿಲೆತಶಿ ನೈವೆ?
ಅಧಿಕಾರಿಲೆ ಪಯಲೆಚೆ ಚೂಕಿಕ ಆಯೋಗ ವಾರ್ನಿಂಗ್ ದೀವನು ಮಾಫ ಕರತಾ. ಮಾಹಿತಿ ದಿವೊವಚೆ ಆಯೋಗಾಚೆ ಮೂಲ ಉದ್ದೇಶ ದೆಕೂನು ದಂಡನೆ ಪಶಿ ಫೂಡೆ ಸಾರ್ವಜನಿಕಾಂಕ ಮಾಹಿತಿ ಮೆಳ್ಯಾಕಿ ನಾಕಿ ಮ್ಹೋಣು ಖಾತ್ರಿ ಕೋರನು ಉಪರಾಂತ ಪ್ರಕರಣಾಚೆ ಸ್ವರೂಪ ಪಳೊವನು ಕ್ರಮ ಘೆತ್ತಾ. ಸುಮಾರ ಪ್ರಕರಣಾಂತು ಮಾಹಿತಿ ಅಧಿಕಾರಿನ ಮಾಹಿತಿ ದೀನಾಶಿ ಆಶಿಲೆ ಸಂದರ್ಭಾರಿ ದಂಡ ಘಾಲ್ಲಿಲೆ ನಿದರ್ಶನ ಖೂಬ ಆಸಾ. ಅಪೀಲಾಚೆ ವಿಚಾರಣೆಕ ಹಾಜರ ಜಾಯನಾಶಿಲೆ ಅಧಿಕಾರಿಲೆ ವಿರುದ್ಧ ಶಿಸ್ತುಕ್ರಮ ಘೆತ್ತಿಲೆ ಆಸಾ.
ಏಕ ಅಪೀಲ ಅರ್ಜಿ ದೋನ ಮಿನಿಟಾಂತು ವಿಚಾರಣ ಕರಚೆ ಕಾಟಾಚಾರಾಕ ಮ್ಹೋಣು ದೀಸನಾವೆ?
ಅಧಿಕಾರಿ ಮಾಹೆತ್ ದಿವಚಾಕ ಸಿದ್ಧ ಆಸ್ತಾನಾ ಯಾ ಮಾಹೆತ್ ದೀವನು ಜಾಲ್ಲಿಲೆ ಆಸಲೆರಿ ವಿಚಾರಣಾ ಭೆಗ್ಗಿಚ ಕೈದ ಜಾತ್ತಾ. ಅಧಿಕಾರಿ ಸರಕಾರಿ ಕಾಮಾಕ ನವೋ ಮನೀಸ ಆಸಲೆರಿ ತಾಂಕಾ ಕಾನೂನಾಚೆ ಜಾಗೃತಿ ಹಾಡೊವಚೆ ದೃಶ್ಟಿನ ಥೋಡೆ ಅವಧಿ ಚಡಚ ಘೇವನು ವಿಸ್ಕಾವುನು ಸಾಂಗತಾತ್. ಎಕಲಿ ಸ್ತ್ರೀ ದೂರ ಗಾಂವಾ ಥಾವ್ನು ಪ್ರಯಾಣ ಕೋರನು ಅಥೋರೈಸೇಶನ್ ಪತ್ರ ಘೇನಾಶಿಚಿ ಆಯಿಲಿ. ತಶಿ ಮ್ಹೋಣು ತಿಕಾ ವಿಚಾರಣೆಕ ಅವಕಾಶ ದೀವನು ಅಜಮಾಸ 25 ಮಿನಟ್ ಘೇವನು ಪ್ರಕರಣಾಚೆ ವಿಚಾರಣ ಕೆಲ್ಲಿಲೆ ಆಸಾ.
ತುಮಗೆಲೆ ಅಮೂಲ್ಯ ವೇಳು ಆಮಕಾ ದಿಲ್ಲೆಲೆಕ ಖೂಬ ಆಭಾರಿ. ಧನ್ಯವಾದ.