90 ದ ದಶಕಡ್ ಪುಟುದಿನಕುಲು ಬಾರಿ ಪುಣ್ಯವಂತೆರ್. ಅಕುಲು ಪೆರಿಯಾಕ್ಲೆನ ಬಂಗದ ಬದಕ್‌ದೊಟ್ಟುಗು ಬೆಯ್ಯೊಂದು ಇತ್ತೆದ ಪೊಸತನದೊಟ್ಟುಗು ಅರಲೊಂದುಪ್ಪುನಕುಲು.
ಕಾಲ ಯೇತ್ ಬದಲಾಂಡಲಾ ನಮ್ಮ ಜೋಕುಲಾಟಿಗೆದ ದಿನೊಕುಲೆನ್ ಎನ್ನ್‌ನಗ ಉಡಲ್ ಬೆಪ್ಪು ಆಪುಂಡು ಇತ್ತೆದ ಜೋಕುಲ್ನ ಅವಸ್ಥೆ ತೂನಗ ಬಾರಿ ಮನಸ್‌ಗ್ ಬೇಜಾರ್. ಬಂಗದ ಬೇಲೆ ಗೊತ್ತುಜ್ಜಿ , ಎರ್ಲಾ ಒಂತೆ ದಡಿಟ್ ಪಾತೆರ್ಯೆರ್ಡ ತಾಂಗೊನ್ನ ಸಕ್ತಿ ಇಜ್ಜಿ. ಆಂಡ ನಮ ಅಂಚ ಅತ್ತ್ ಬೇನೆ ಬೆಸರ್ ತೆಲಿಕೆ ನಲಿಕೆದೊಟ್ಟುಗ್ ಲತ್ತ್ ಪ್ರಾಯೊನ್ ಕಲೆತಿನಕುಲು.
ದುಂಬುದ ಅಜ್ಜಿ ಅಜ್ಜೆರೆಗ್ ಎಡ್ಡೆ ತಂಗದ ಪಂಡ ಪುಲ್ಲಿನಕುಲು. ಅಕಲ್ನ ಒವು ಬೇಲೆಗ್ಲಾ ಪುಲ್ಲಿಲು ಜತೆಕುಪ್ಪೊಡು. ಜೋಕುಲು ಯೇತ್ ಬೇಲೆ ಮಲ್ಪುವೆರಾ ಬುಡ್ಪೆರ ಆಂಡ ಚೊರೆ ಚೊರೆ ಪಾತೆರೊಂದು, ಪ್ರಶ್ನೆದ ಮಿತ್ತ್ ಪ್ರಶ್ನೆ ಕೇನೊಂದು ಮಂಡೆ ತಿನೊಂದು ಇತ್ತೆರ್ಡನೆ ಪ್ರಾಯದಕಲೆಗ್ ಪೊರ್ತು ಪೋಪಿನಿ.
ಹಳ್ಳಿದ ಜೋಕುಲ್ನ ಬೇಲೆ ಪುಲ್ಯ ಕಾಂಡೆನೇ ಸುರು ಆಪುಂಡು. ದೊಡ್ಡ ಬೊರಿದ್ ಕೊಂಡೆಡ್ ಲತ್ತ್‌ದ್ ಬಾಟ್ಲಿ‌ಡ್ ದಿಂಜಾದ್ ದೀತಿನ ಪೇರ್‌ನ್ ಮಾತ ಇಲ್ಲಗ್ ಕೊರ್ದು ಬರೊಡು, ಕ್ಯಾನ್‌ಡ್ ದಿಂಜಾದಿನ ಪೇರ್‌ನ್ ಪೇರ್‌ದ ಟೆಂಪೊಗ್ ಕೊರೊಡು, ಕೈ ಕಂಜಿಲೆನ್ ಗುಡ್ಡೆಗ್ ದೇರೊಡು ಅತ್ತ್ಂಡಾ ಕಂಡದ ಪುನಿಕ್ ಗೂಂಟ ಪಾಡ್‌ದ್ ಕಟ್ಟೊಡು, ಜಾಲ್ ಅಡಿಪೊಡು, ಪೂತ ದೈಕ್ ನೀರ್ ಪಾಡೊಡು, ಕೋರಿಲೆನ್ ಗೂಡ್‌‌ಡ್ದ್ ಪಿದಯಿ ಬುಡ್ದ್ ನೀರ್ ಬಾರ್ ದೀವೊಡು.
ಪುಲ್ಯ ಕಾಂಡೆ ಲಕ್ಕ್‌ದ್ ಕಿರೆಂಗ್‌ದ ಚೂಲಿನ್ ದೆತ್ತ್‌ದ್ ಹಪ್ಪಳ, ಸಾಂತನಿ ಮಲ್ಪೊಡು, ಕಂಡೊಡು ಕಿರೆಂಗ್‌ದ ಬೂರು, ಮುಂಚಿ, ತೌತೆ, ಕೆಂಬುಡೆ, ತುರೆ, ತೆಕ್ಕರೆ, ಬಸಳೆ ನಡ್ತೆರ್ಡ ಪನಿ ದೆಪ್ಪರೆ ಕೆದುಡ್ದ್ ನೀರ್ ಕನತ್‌ದ್ ತಲಿಪೊಡು. ಮರಿಯಲಗ್ ಪಂದ್ ತುರೆ, ತೌತೆ, ಕೆಂಬುಡೆನ್ ಪಕ್ಕಾಸ್‌ಗ್ ಕಟ್‌ದಿನ ರೀಪುಗ್ ಕಟ್ಟರೆ ಒಲಿಕ್ ಸುರಿದ್ ಕೊರೊಡ್, ವರ್ಸದ ಅಗೆಲ್‌ದಾನಿ ಮಲ್ಲ ಮಲ್ಲ ಬಾಜನಡ್ ನೀರ್ ದಿಂಜಾವೊಡು, ಇಲ್ಲ್‌ನ್ ಒತ್ತರೆ ದೀವೊಡ್, ಕೋರಿ ತೊಲ್ಲುದು ಕೊರೊಡು.
ದೊಡ್ಡ ಅಂಬಿ ಅಡಿಪರೆ ಉಂತಿಯೆರ್ಡ ನೀರ್ ಮೈಪರೆ ಪೋಡು, ಕುಂಟಿ ಮೈಪು ಪತೊಂದು ಬಿಜಿಕ್ರೆ ಅರಯೆರೆ ಪೋಯೆರ್ಡ ತಾರೆದೊಲಿತ ತೊಟ್ಟೆ, ಈಂದ್ ಚೌರಿದ ಕುರ್ಕಿಲ್ ಪತೊಂದು ಅರೆನ ಪಿರವುಡೇ ಪಜ್ಜೆ ಪಾಡೊಡು, ಅಜ್ಜೆರ್ ಎರುನು ಪತೊಂದು ಪಿಡದಿಯೆರ್ಡ ನುಗ, ನಾಯೆರ್ ಪತೊಂದು ಪಿರವುಡುಪ್ಪೊಡು, ದಪ್ಪರೆ ಅತ್ತ್ಂಡ ಬೈದೊಂಕರೆ ಉಂತಿಯೆರ್ಡ ಎರ್ಲೆನ ದುಂಬ್ಡ್‌ದ್ ಪೋವೊಡ್, ಬೆನ್ನಿದ ಬೇಲೆದಪಗ ಕಂಡೊಗ್ ಪೊರ್ತು ಪೊರ್ತುಗ್ ಗಂಜಿ ತೆಲಿ, ಚಾ ತಿನರೆ, ವನಸ್, ನೀರ್ ಕೊನೊಡ್. ದತ್ತ್‌ದ್ ಬತ್ತಿನ ಎರುಕ್ಲೆನ್ ಮೇಪೆರೆ ಕುಲ್ಲೊಡು, ತಾರಿದ ಸಿರಿ ಒಲಿಟ್ ಉರ್ದುದು ದೆಕ್ಕೊಡು, ಕಿದೆಟ್ ಕಟ್‌ದ್ ಎಣ್ಣೆ ಪೂಜೊಡು, ಕುಡು ಬೊಕ್ಕ ತೌಡ್‌ನು ಮೆತ್ತ್‌ದ್ ಪಾಡೊಡು, ಬೈಪನೆಗ್ ಬೈ ಪಜಿರ್ ಮೊರೆತ್ ಪಾಡೊಡು, ಎರ್ಲೆಗ್ ಅರ್ಕಂಜಿ ಪರ್ರೆ ಮಯ್ಪೊಡು.
ಬೈಲ ಕಂಡೊಗ್ ದಂಬೆ ಮರಯಿ‌ಡ್ ನೀರ್ ತೇಪುನ, ಬೊಟ್ಟು ಕಂಡೊಲೆಗ್ ಮರಾಯಿಡ್ದ್ ತೋಡು‌ಗ್ ನೀರ್ ಮೈಪುನಗ ಪನೆ‌ಕ್ ಕಟ್‌ದಿನ ಬಲ್ಲ್‌ನ್ ಪತೊಂದು ಕಡೆಗುರಿಕ್ ಲಾಗ್ಯುನ, ಕೆದು ಉಗ್ಗೆಲ್ದ ಕೆಸರ್ ದೆಪ್ಪುನ, ಗುವೆಲ್ಗ್ ಬೂರಿನ ಕಿನ್ನಿ, ಕೋರಿ, ಕೊಡಪಾನ ದೆಪ್ಪುನ ಬೇಲೆ ಮಲ್ತೊಂದಿತ್ತ.
ಬಯ್, ಕೆಯ್ ದರ್ಪೊಡು,ಬೈತ ಮುಟ್ಟೆ ಮುಟ್ನಗ ಬಯ್ ಕೊನೊಡು, ಕಿದೆತ ಮಾಡ್ ಬೇನಗ ಉಂಡ್ಶ ಕೊನೊದು ಕೊರೊಡು, ಅಜ್ಜೆರ್ ಬಯ್‌ನ್ ಬೊದುಲಾದ್ ಮನೆ ದೀದ್ ಕುಲಿಯೆರ್ಡ ಆರ್ ಬಯ್‌ನ್ ಕೊರೊಂದಿತ್ತಿಲೆಕನೆ ಕೋಲು ತಿಕ್ಕಾದ್ ಪಿಂಟಾವೊಂದು ಪಿಂಟಾವೊಂದು ಬಯ್‌ತ ಬಲ್ಲ್ ಮಲ್ಪೊಡು, ಮುಡಿ ಕಟ್ಟ್‌ನಗ ಬಲ್ಲ್ ಪತ್ತೊಡು, ಜಾಲ್‌ಗ್ ದೊಂಪ ಪಾಡ್ನಗ, ಜಗಲಿಗ್ ತಟ್ಟಿ ಕಟ್ಟ್‌ನಗ ದಡ್ಡಿಪಾಲೆ ಕನರ್ ಬಾಡಾದ್ ತಿಗ್ತ್‌ದ್‌, ಕೊರೊಡು. ತುಪ್ಪೆ ಪಾಡ್ನಗ ಬಲ್ಲ್ ಪತೊಂದು ತುಪ್ಪೆದ ಸುತ್ತು ತಿರ್ಗೊಡು, ರಜೆತಾನಿ ಕಿದೆತ ಗೊಬ್ಬರ ದೆಪ್ಪೊಡು. ಬೆನ್ನಿದ ಬೇಲೆ ಸುರು ಆನಗ ಕರೆ ಮೆದಿ ಕಡ್ಪುನಗ ಪೋವೊಡು, ಬೊಲ್ಕಲ್ಲ್ ಕನತ್‌ದ್ ಗುದ್ದುದು ಪೊಡಿ ಮಲ್ತ್‌ದ್ ಕತ್ತಿ ಕೂಟೊಡ್, ತೂಂಟನ್‌ಗ್ ತೂ ಪಾಡ್ನಗ ತೋಡುದ ಬರಿತ ಮನ್ನ್‌ದ ಬಾವೆ, ಕಂಡದ ಗೆಟ್ಟಿ, ಬಿಜಿಕ್ರೆ, ಕರೆಮೆದಿ ಕನತ್‌ದ್ ಪಾಡೊಡು.
ಪಿರಯ, ಕಾಯ ಎಲ್ಯ ಆಂಡಲಾ ನಮ್ಮ ಸಕ್ತಿಗ್ ಆಪಿನ ಪೂರ ಬೇಲೆ ಮಲ್ತುದ, ಕೆಯ್,ಬಯ್, ನೇಜಿ, ನೋರೆ, ಪಜಿರ್, ಬೊನ್ಯ, ಗೊಬ್ಬರ ತುಂಬುನ, ಬಾರ್ ತುಂಬೊಂದ್ ಮೈಲ್ ಗಟ್ಟಲೆ ನಡತ್‌ದ್ ಅರಿತ ಮಿಲ್ಲ್‌ಗ್ ಪಾಡ್‌ದ್ ಅರಿ ತುಂಬೊಂದು ಬರ್ಪಿನ, ದರ್ತ್‌ದ್ ಪಾಡ್ದಿನ ಕನಕ್‌ಲೆನ್ ಕನತ್‌ದ್ ಅಟ್ಟಿ ಕಟ್ಟುನ, ಕಲ್ಲ್‌ಡ್ ಕಜಿಪು ಕಡೆಪಿನ, ಮರಿಯಲಗ್ ಪಂದ್ ಬಿಜಿಕ್ರೆ ಅರಾದ್ ಕನತ್‌ದ್ ರಾಶಿ ಮಲ್ಪುನ, ಮಡಲ್ ಆಟ್ಟೊಗ್ ಪಾಡುನ, ಬೆಂದ್‌ರ್ ಬೊಕ್ಕ ಅರ್ಕಂಜಿ ಬೆಚ್ಚ ಮಲ್ಪುನ, ಕಿದೆತ ಅಂಬಿ ದೆಪ್ಪುನ , ಕಿದೆತ ಅಡಿಕ್ ನೋರೆ, ತಪ್ಪು ಕನತ್ ಪಾಡುನ, ತಪ್ಪು ತೌರ್ನ, ಮಡಲ್ ಮೊಡೆಪಿನ, ಒಲಿನ್ ಒಯ್ತ್‌ದ್ ಮೈಸುಡಿ ಮಲ್ಪುನ ,ಇಲ್ಲದಕುಲು ಪೂರ ರಾತ್ರೆ ನೇಜಿದ ಕಂಡೊಡು ನೇಜಿ ದೆಪ್ಪರೆ ಉಂತಿಯೆರ್ಡ ಪುರು ಬಾಲೆನ್ ಮಾನಾದ್ ಜೆಪುಡಾವುನ, ಕಾಂಡೆ ಬೇಗ ಲಕ್ಕ್‌ದ್ ಕುಕ್ಕು, ಗೋಂಕು, ಪುಲಿ ನಾಡ್‌ದ್ ಪೆಜಿದ್ ಕನಪಿನ, ಪುಲಿನ್ ನುಂಗಾದ್ ಬಿತ್ತ್ ಜಪ್ಪುನ. ಕಟ್ಟದ ಕೋರ್ಲೆನ್ ಉಲಯಿ ಪಿದಯಿ ಕಟ್ಟುನ, ಪೂ ಕಟ್ಟುನ, ಮೀಯರೆ ಬೆಂದ್ರ್‌ಗ್ ನೀರ್ ಕೂಟುನ, ತೂ ಪಾಡ್‌ದ್ ಬೆಚ್ಚ ಮಲ್ಪುನ, ನೀರೊಯ್ತ್ ತಾರೆಗ್ ಮೈಪುನ, ಅಂಗಡಿಗ್ ಪಾರ್ ಪೋದು ಸಾಮಾನ್ ಕನಪಿನ, ಬೀಡಿದ ಪಂದ್ ಒಂಜಾತ್ ಬೇಲೆಲು ನಕ್ಕ್ ಕುತ್ತುನ, ನೂಲು ಪಾಡುನ, ಇರೆ ಕತ್ತೆರುನು, ಗಲ್ಲಿದ ನೂಲು ಬುಡ್ಪಾವುನು, ರೀಲ್‌ಗ್ ನೂಲು ಸುಂದುನು, ಬೀಡಿ ಕಟ್ಟುನ, ಅಂಗಡಿಗ್ ಬೀಡಿ ಕೊನೊಪಿನ ಬೇಲೆ ಮಲ್ತೊಂದಿತ್ತ.
ತೂವರೆ ಪೊಂಡ ಹಿರಿಯಾಕ್ಲೆನ ಪೂರಾ ಬೇಲೆಗ್ ಪುಗೆಲಾತ, ಅಕಲ್ನ ಪಜ್ಜೆಗ್ ಪಜ್ಜೆ ದೀವೊನ್ದ್ ನಡತ್‌ದ. ಅಂಚದೇ ಬದ್ಕ್‌ಡ್ ಏತೇ ಎರ್ತೆ ಜಪ್ಪೆಲ್ ಬತ್ತ್ಂಡಲಾ ಎರ್ಕಂದೆ ಸೆಲ್ಟಂದೆ, ನಾಲ್ ಜನಟ ಎಡ್ಡೆಡ್ ಪಾತೆರೊಂದು ಕುಸಿಟ್ ಬದುಕೊಂದುಲ್ಲ. ಏತೇ ಬಂಗ ಇತ್ತ್ಂಡಲಾ ಜೀವನ ಯಾವು ಪಂದ್ ಆವನ್ದ್. ಎಲ್ಯ ಉಪ್ಪುನಗ ಮಲ್ದಿನ ಬೇಲೆ ಅಪಗ ಬಂಗ ಪಂದ್ ಆಂಡಲಾ ಇತ್ತೆ ನಮ್ಮ ಮನಸ್‌ನ್ ಬೊಕ್ಕ ಜೂವನ್ ಗಟ್ಟಿ ಮಲ್ತ್‌ದ್ಂಡ್ ಪಂಡಲಾ ತಪ್ಪಾವಂದ್.
- ಗೀತಾ ಲಕ್ಷ್ಮೀಶ್