ಮೊನ್ನೆ ಭೂಕುಸಿತ ಆದ ಜಾಗಗಳಲ್ಲಿ ಬೆಟ್ಟದ ತಳ ಭಾಗದಲ್ಲಿ ಏನೋ ವಿಚಿತ್ರ ಸದ್ದು ಕೇಳಿ ಬರುತ್ತಿವೆ ಎಂದು ಅಲ್ಲಲ್ಲಿ ಸುದ್ದಿಯಾಗುತ್ತಿದೆ. ಬಹುಶಃ ಇದು ಭೂಮಿಯ ಒಳಗಿನ ಸದ್ದು ಇರಲಿಕ್ಕಿಲ್ಲ. ಈ ಸಾರಿ ಹಠಾತ್ ಈ ಸದ್ದು ಯಾಕೆ ಆಗುತ್ತಿವೆ ಅಂದರೆ ಮೊನ್ನೆ ಭೂಕುಸಿತ ಆದ ಬೆಟ್ಟಗಳ ಹತ್ತಿರ ಹೋದರೆ ತಿಳಿಯುತ್ತದೆ.
ಭೂಕುಸಿತ ಆದ ಜಾಗಗಳಲ್ಲಿ ಜಲಪಾತಗಳು ಇಲ್ಲದ ಜಾಗಗಳಲ್ಲಿ ಹೊಸ ಜಲಪಾತ ಗಳು ಸೃಷ್ಟಿ ಆಗಿವೆ. ಮತ್ತು ಈಗಾಗಲೇ ಇದ್ದ ಜಲಪಾತಗಳು ತನ್ನ ವ್ಯಾಪ್ತಿ ಮೀರಿ ಹರಿಯುತ್ತಿವೆ ಮತ್ತು ಕೆಲವು ಜಲಪಾತಗಳು ತನ್ನ ಸಹಜ ದಾರಿ ಬಿಟ್ಟು ಕವಲುಗಳಾಗಿ ಬೇರೆ ಯಾವುದೋ ದಿಕ್ಕಿನಲ್ಲಿ ಹರಿಯುತ್ತಿವೆ. ಕೇವಲ 3 ಅಡಿ ಅಗಲದ ಚಿಕ್ಕ ಝರಿ ( ನಂದಿ ಕಾಡು, ಸಿಂಗ ನಾರ್ ) 80 ಅಡಿ ಅಗಲದ ದಾರಿ ಮಾಡಿ ಹರಿಯುತ್ತಿವೆ. ಮತ್ತು ಈ ಹಿಂದೆ ಇದ್ದ ಜಲಪಾತಗಳು ಇದ್ದ ಜಾಗದ ಮಣ್ಣು, ಮರ, ಗಿಡ, ಕಲ್ಲು ಗಳು ಅಲ್ಲಿಂದ ಜಾರಿ ಎಲ್ಲೋ ಎತ್ತಲೋ ಹರಡಿ ಹೋಗಿವೆ.
ಕಾಡಿನಲ್ಲಿ ಮುಚ್ಚಿ ಹೋಗಿದ್ದ ಜಲಪಾತಗಳು ಇಂದು ಅಲ್ಲಿ ಸಂಪೂರ್ಣ ಓಪನ್ ಆಗಿ ನೀರು ಧುಮುಕುವ ಶಬ್ದ ಅದರ ವಿರುದ್ಧ ಬೆಟ್ಟ ಅಥವಾ ಕಾಡಿನ ಪ್ರದೇಶಕ್ಕೆ ಪ್ರತಿ ಧ್ವನಿ ಆಗಿ ಹರಡುವ ಕಾರಣ ಬೆಟ್ಟದ ಭಾಗದಿಂದ ವಿಚಿತ್ರ ಸದ್ದು ಕೇಳಿಸುತ್ತವೆ. ಉದಾಹರಣೆಗೆ ಈ ಚಿತ್ರದಲ್ಲಿ ಇರುವ ದುರ್ಗದ ಬೆಟ್ಟದ ಕೆಳಗಿನ ಮಕ್ಕಿ ಜಲಪಾತ ಕಾಡಿನ ಒಳಗೆ ಗುಪ್ತ ಗಾಮಿನಿ ಯಾಗಿ ಮೌನವಾಗಿ ಧುಮು ಕುತಿತ್ತು..ಆದರೆ ಮೊನ್ನೆ ಯ ದುರಂತದ ನಂತರ ಈ ಜಲಪಾತ ದ ಎರಡೂ ಕಡೆಗಳಲ್ಲಿ ಎಲ್ಲಾ ಕೊಚ್ಚಿ ಹೋದ ಕಾರಣ ಇಂದು ಮಕ್ಕಿ ಜಲಪಾತ ದ ಪಥ ಅಗಲವಾಗಿ ಅದರ ಎದುರು ದಿಕ್ಕಿನ ಬೆಟ್ಟಕ್ಕೆ ನೀರು ಧುಮುಕುವ ಸದ್ದು ಪ್ರತಿಧ್ವನಿ ಆಗಿ ಏನೋ ವಿಚಿತ್ರ ಸದ್ದು ಒಂದು ಕೀ.ಮಿ. ದೂರಕ್ಕೂ ಕೇಳಿಸುತ್ತಿದೆ. ಅದೇ ರೀತಿ ಮೊನ್ನೆಯ ಭೂಕುಸಿತದ ಪರಿಣಾಮವಾಗಿ ದುರ್ಗದ ಬೆಟ್ಟ, ಬಾಳೆ ಗುಡ್ಡ, ದೊಡ್ಡೇರಿ ಬೆಟ್ಟ, ಹೊಸಮನೆ ಗುಡ್ಡ, ಮಲೆ ಮನೆ ಬೆಟ್ಟ, ರಾಮನ ಗುಡ್ಡ, ಬಾಲೂರು ಬೆಟ್ಟ....ಹೀಗೆ ಇನ್ನೂ ಅನೇಕ ಕಡೆಗಳಲ್ಲಿ ಸಹಜ ನೀರಿನ ಪಥ ಬದಲಾವಣೆ ಆಗಿ ಮತ್ತು ಬೆಟ್ಟ ಇದ್ದ ಕಡೆ ಈಗ ಅಲ್ಲಿ ಕುಸಿತ ಆಗಿ, ಎಲ್ಲೋ ಇದ್ದ ದೊಡ್ಡ ಗಾತ್ರದ ಮರ, ಕಲ್ಲುಗಳು ಎಲ್ಲೋ ಜಾರಿ ಹೋದ ಕಾರಣ ಧಾರಾಕಾರ ಮಳೆ ಬರುವಾಗ ಮತ್ತು ಜಲಧಾರೆಯ ನೀರು ಹೆಚ್ಚಾದಾಗ ಧ್ವನಿ .. ಪ್ರತಿಧ್ವನಿ ಆಗಿ ಈವರೆಗೆ ಕೇಳದ ಏನೋ ವಿಚಿತ್ರ ಧ್ವನಿಯು ಕೇಳಿಸುತ್ತವೆ.
ಈ ಬಗ್ಗೆ ಭೂಗರ್ಭ ಇಲಾಖೆ, ಜಲ ತಜ್ಞರು, ಪಶ್ಚಿಮ ಘಟ್ಟ ಅಧ್ಯಯನಕಾರರು ಒಂದು ತನಿಖಾ ಸಮಿತಿ ಮಾಡಿ ಭೂಕುಸಿತ, ಜಲಸ್ಫೋಟ ಕೆ ಕಾರಣವೇನು ಎಂದು ಅಧ್ಯಯನ ಆಗಬೇಕು. ಇನ್ನು ಮುಂದೆ ಆಗಲಿರುವ ಪ್ರಾಕೃತಿಕ ದುರಂತವನ್ನು ತಡೆಯುವ ಪ್ರಯತ್ನ ಆಗಲೇಬೇಕು.
ಇದು ಯಾವುದೂ ಅಧ್ಯಯನ , ತನಿಖೆ, ಸಮೀಕ್ಷೆ ಆಗದೇ ಇದ್ದಲ್ಲಿ...ಕಳೆದ ವರ್ಷ ಮಡಿಕೇರಿ...ಈ ಸಲ ಚಾರ್ಮಾಡಿ, ಶಿರಾಡಿ ಆಯಿತು...ಮುಂದಿನ ವರ್ಷ ಇನ್ನೆಲ್ಲೋ ಎಂಬ ಭಯದಿಂದ ಬದುಕುವಂತೆ ಆಗಬಾರದು...ಅದಕ್ಕಿಂತಲೂ ಹೆಚ್ಚಾಗಿ ಪಶ್ಚಿಮ ಘಟ್ಟದಲ್ಲಿ ಈ ರೀತಿ ನೈಸರ್ಗಿಕ ದುರಂತ ಆದರೆ ಭವಿಷ್ಯದಲ್ಲಿ ದಕ್ಷಿಣ ಭಾರತದ ಎಲ್ಲಾ ಕಡೆ ಸಮಸ್ಯೆ ವಿಪರೀತ ಆಗಬಹುದು.
Dinesh Holla ( Environmentalist )